اندر کلمہ کِل کِل کردا، عشق سکھایا کلماں ھوُ

مفہوم:

اس بیت میں توحید کے اسرار پوشیدہ ہیں ۔توحید کا مرتبۂ اوّل زبان سے کلمہ پڑھنا، مرتبۂ دوم تصدیق ِقلب سے کلمہ پڑھنا ہے، مرتبۂ سوم یہ ہے کہ کلمہ کی حقیقت کا مشاہدہ ہو جائے۔ یہ مقربین کا مقام ہے۔ مرتبۂ چہارم یہ ہے کہ جملہ موجودات کے وجود میں بجزذاتِ اللہ، کسی اور کو نہ دیکھنا اور کلمہ کی اس حقیقت اور کنہ تک پہنچنا طالب کا اور پہنچانامرشد کا کام ہے۔ آپ رحمتہ اللہ علیہ  فرماتے ہیں ’’میرے اندر کلمہ کی جو حقیقت موجود ہے اسے میں نے عشق کی وجہ سے پایا ہے اور کلمہ کی حقیقت نے باطن کے اندر ہل چل مچا رکھی ہے۔ پوری کائنات،تمام آسمانی کتابوں اور قرآنِ مجید کاعلم کلمہ طیبہ کے اندر ہے۔ دنیا کے تمام مفسرین اور اہل ِقلم اس کلمہ کی شرح لکھتے چلے آرہے ہیں لیکن ابھی تک اس کی حقیقت کو نہیں سمجھ سکے۔ یہ کلمہ مجھے میرے مرشد نے سمجھایا اور تلقین کیا ہے (یعنی مرشد کی تلقین کے بغیر کلمہ کی حقیقت سمجھ میں نہیں آتی) اور میں نے اس کی حقیقت اور کنہ کو پالیا ہے لہٰذا اب مجھے کوئی غم اورفکر نہیں ہے۔‘