Khanqah

خانقاہ سلسلہ سروری قادری

خانقاہ سلسلہ سروری قادری کا قیام

اللہ پاک قرآنِ پاک میں ارشاد فرماتا ہے:
فِیْ بُیُوْتٍ اَذِنَ اللّٰہُ اَنْ تُرْفَعَ وَ یُذْکَرَ فِیْھَا اسْمُہٗ یُسَبِّحُ لَہٗ فِیْھَا بِالْغُدُوِّ وَ الْاٰصَالِ  (النور۔35)
ترجمہ: (اللہ کا نور) ان گھروں پر ہے جن کے بلند کیے جانے اور جن میں اسمِ اللہ کا ذکر کیے جانے کا اللہ نے حکم دیا ہے اور (ان گھروں میں اہلِ ذکر) صبح شام ذکرِ اللہ کرتے ہیں۔
حضرت شہاب الدین سہروردی رحمتہ اللہ علیہ فرماتے ہیں:
* اس آیت مبارکہ میں گھروں سے مراد خانقاہیں ہیں ۔(عوارف المعارف)
خانقاہ سے مراد وہ جگہ ہے جہاں طالبانِ مولیٰ ہر لمحہ صبح شام اسمِ اللہ ذات کا ذکر کرتے ہیں اور مرشد کی صحبت اور رہنمائی میں اپنی روح کی پاکیزگی حاصل کرکے اللہ کے قرب کی نعمت سے مالا مال ہوتے ہیں۔
سلطان العاشقین حضرت سخی سلطان محمد نجیب الرحمن مد ظلہ الاقدس نے عین سلطان العارفین حضرت سخی سلطان باھُو رحمتہ اللہ علیہ ، حضرت سخی سلطان سیّد محمد عبداللہ شاہ مدنی جیلانی رحمتہ اللہ علیہ ،حضرت سخی سلطان پیر محمد عبدالغفور شاہ رحمتہ اللہ علیہ ،شہبازِ عارفاں حضرت سخی سلطان سیّد پیر محمد بہادر علی شاہ کاظمی المشہدی رحمتہ اللہ علیہ ، سلطان الاولیا حضرت سخی سلطان محمد عبد العزیز رحمتہ اللہ علیہ ،سلطان الفقر ششمؒ حضرت سخی سلطان محمد اصغرعلی رحمتہ اللہ علیہ اور دیگر صوفیا کرام کے طریقہ کے مطابق 23۔اکتوبر 2009ء (3۔ذیقعد 1430ھ ) بروز جمعتہ المبارک اپنے مرشد پاک سلطان الفقر ششمؒ کے عرس پاک کی مبارک تقریب میں’’خانقاہ سلسلہ سروری قادری‘‘کی بنیاد سلطان الفقر ہاؤس 4/A۔ ایکسٹینشن ایجوکیشن ٹاؤن وحدت روڈ لاہور میں رکھی۔ اس خانقاہ کے قیام کا مقصد طالبانِ مولیٰ کی تربیت اور تزکیہ نفس اسی طریق پر کرنا تھا جس طریق پر صوفیا کرام کی خانقاہوں میں راہِ فقر کے طالبوں اور مریدوں کی تربیت اور تزکیۂ نفس ہوتا رہا ہے۔ اس خانقاہ میں لاہور کے باہر سے بھی مریدین آکر مقیم ہوتے ہیں اور چند دِن دنیا سے خلوت نشین ہوکر اپنے مرشد کی صحبت سے فیض یاب ہوتے ہیں۔
تحریک دعوتِ فقر(رجسٹرڈ)، سلطان الفقر پبلیکیشنز(رجسٹرڈ)، سلطان الفقر ڈیجیٹل پروڈکشنز اور ماہنامہ سلطان الفقر لاہور کے دفاتر بھی اسی خانقاہ سلسلہ سروری قادری میں قائم ہیں۔ سلطان العاشقین حضرت سخی سلطان محمد نجیب الرحمن مدظلہ الاقدس کے تربیت یافتہ مریدین دن رات کتب و رسائل اور ویب سائٹس کے ذریعے فقر کی تعلیمات کو دنیا بھر میں عام کرنے کے لیے اسی خانقاہ میں ہمہ وقت کوشاں ہیں۔
خانقاہ کے دروازے ہر خاص و عام، ہر مکتبہ فکر اور ہر فرقے کے لیے دن رات کھلے ہیں۔ سلطان العاشقین حضرت سخی سلطان محمد نجیب الرحمن مدظلہ الاقدس 2019 تک ہر اتوار کو اسی خانقاہ میں طالبانِ مولیٰ سے ملاقات بھی فرماتے رہے لیکن صرف مرد حضرات کو خانقاہ سلسلہ سروری قادری میں داخل ہونے کی اجازت تھی۔ خواتین کا داخلہ خانقاہ سلسلہ سروری قادری میں ممنوع تھا۔ خواتین طالبانِ مولیٰ سلطان العاشقین حضرت سخی سلطان محمد نجیب الرحمن مدظلہ الاقدس سے بروز اتوار ان کی رہائش گاہ پر ملاقات کرتی تھیں جہاں ان کی اہلیہ محترمہ بھی موجود ہوتی تھیں۔
تمام روحانی محافل 2019تک اسی خانقاہ میں منعقد ہوتی رہیں تاہم طالبانِ مولیٰ کی بڑھتی ہوئی تعداد کے پیشِ نظرسلطان العاشقین حضرت سخی سلطان محمد نجیب الرحمٰن نے یکم دسمبر2017 کو ایک  وسیع و عریض خانقاہ  کے قیام کا اعلان  فرمایا۔ 
تحریک دعوتِ فقر نے خانقاہ سلسلہ سروری قادری کے بارے میں  ایک انگلش  ویب سائٹ بنائی ہے  خانقاہ سلسلہ سروری قادری کے بارے میں تفصیل سے جاننے کے لیے    اس لنک پر کلک کریں:

 خانقاہ  سلطان العاشقین کا قیام اور مسجد زہراؓ   کی تعمیر

سلطان العاشقین حضرت سخی سلطان محمد نجیب الرحمٰن مدظلہ الاقدس نے مریدین کی تیزی سے بڑھتی ہوئی تعداد کے پیش نظر یکم دسمبر2017ء(12ربیع الاوّل1439ھ) بروز جمعتہ المبارک کو  میلادِ مصطفی صلی اللہ علیہ وآلہٖ وسلم کے موقع پر ایک وسیع خانقاہ اور مسجد کی تعمیر کا اعلان کیا اور ساتھیوں سے اپیل کی کہ اس میں بڑھ چڑھ کر حصہ لیں ۔ تین سال کی جدوجہد کے بعد خانقاہ سلطان العاشقین کی تکمیل پر 30 اگست 2020(10 محرم 1442ھ) بروز اتوار سے تمام مریدین (مرد و خواتین) کی محافل اسی خانقاہ میں منعقد ہونے لگیں ۔ ہر اتوار کو  نمازِ ظہر سے قبل’’محفل نورِ مصطفیٰؐ  ‘‘ منعقد ہوتی ہے جس میں سلطان العاشقین حضرت سخی سلطان محمد نجیب الرحمن مدظلہ الاقدس اپنے مریدین کو اپنی پرنور صحبت سے نوازتے ہیں اور ان کے مسائل سنتے اور ان کے لیے دعا فرماتے ہیں۔ محفل کے اختتام پر لنگر تقسیم کیا جاتا ہے خواتین کے لیے پردے کا خاص انتظام ہوتا ہے۔
اس کے علاوہ تحریک دعوتِ فقر کے زیر ِاہتمام اور سلطان العاشقین حضرت سخی سلطان محمد نجیب الرحمٰن مدظلہ الاقدس کی زیر صدارت دو سالانہ عظیم الشان محافلِ میلاد کا انعقاد بھی اسی خانقاہ سلطان العاشقین میں ہوتا ہے۔ ایک محفل 12 ربیع الاوّل کو سرورِ کائنات حضور علیہ الصلوٰۃ والسلام کے یومِ ولادت کے بابرکت موقع پر اور دوسری محفل 21 مارچ کو یومِ منتقلی امانت ِالٰہیہ کے موقع پر۔
 ملک بھر سے طالبانِ مولیٰ اپنے تزکیہ نفس اور روحانی تربیت کے لیے بھی خانقاہ سلطان العاشقین میں قیام پذیر ہوتے ہیں۔مسجدِ زہراؓ  ابھی  تعمیراتی  مراحل میں ہے۔ مسجد کے ساتھ قرآن گیلری بھی تعمیر کی جارہی ہے ۔ مسجدِ زہراؓ اور خانقاہ سلطان العاشقین اس دور میں دنیا بھر کے طالبانِ مولیٰ کے لیے فقر کا مرکز ہیں جہاں صاحبِ فقر کا فیض تا قیامت جاری رہے گا۔(انشا اللہ)